Tryezë Diskutimi për Përmirësimin e Mbikëqyrjes dhe Raportimit në Qendrat e Kujdesit Shëndetësor Parësor kundër Dhunës me Bazë Gjinore

Më 25 qershor 2024, në ambientet e Europe House në Tiranë, Qendra “Aleanca Gjinore për Zhvillim” (GADC) organizoi tryezën e diskutimit me temë “Përmirësimi i Mbikëqyrjes dhe Raportimit në Qendrat e Kujdesit Shëndetësor Parësor kundër Dhunës me Bazë Gjinore”, në kuadër të projektit “Avancimi i Barazisë Gjinore nëpërmjet Mbikëqyrjes dhe Raportimit në Shqipëri” (AGORA), financuar nga Bashkimi Evropian.

Aktiviteti mblodhi përfaqësues të institucioneve publike, organizatave të shoqërisë civile, profesionistë të shëndetësisë dhe aktorë të tjerë të angazhuar në promovimin e barazisë gjinore dhe forcimin e mekanizmave të mbrojtjes ndaj dhunës me bazë gjinore.

Tryeza kishte si qëllim prezantimin e projektit AGORA dhe objektivave të tij kryesore, si dhe nxitjen e bashkëpunimit ndërinstitucional për përmirësimin e përgjigjes së sektorit shëndetësor ndaj rasteve të dhunës me bazë gjinore. Diskutimet u fokusuan në rëndësinë e mbikëqyrjes, raportimit dhe koordinimit ndërmjet institucioneve për të siguruar shërbime cilësore dhe të aksesueshme për gratë dhe vajzat e prekura nga dhuna.

Në hapje të aktivitetit, znj. Mirela Arqimandriti, Drejtoreshë Ekzekutive e GADC, prezantoi projektin AGORA, i cili synon të fuqizojë organizatat e shoqërisë civile të drejtuara nga gratë, grupet komunitare dhe institucionet publike për të monitoruar dhe përmirësuar zbatimin e kuadrit ligjor për barazinë gjinore dhe luftën kundër dhunës me bazë gjinore në Shqipëri.

Më tej, znj. Etleva Sheshi, Drejtoreshë e Politikave të Përfshirjes Sociale dhe Barazisë Gjinore në Ministrinë e Shëndetësisë dhe Mbrojtjes Sociale, ndau informacion mbi arritjet dhe sfidat aktuale në luftën kundër dhunës me bazë gjinore, duke theksuar rëndësinë e bashkëpunimit ndërmjet institucioneve qendrore, pushtetit vendor dhe organizatave të shoqërisë civile.

Në vijim, znj. Jeta Deda, Drejtoreshë e Përgjithshme e Operatorit të Shërbimeve të Kujdesit Shëndetësor, prezantoi perspektivën e sektorit shëndetësor mbi përgjigjshmërinë e qendrave të kujdesit parësor shëndetësor ndaj rasteve të dhunës me bazë gjinore, si dhe nevojën për forcimin e kapaciteteve profesionale dhe mekanizmave të referimit.

Pjesa kryesore e aktivitetit u zhvillua në formën e një paneli diskutimi, ku pjesëmarrësit ndanë përvoja, praktika të mira dhe sfida të hasura në terren. Diskutimet evidentuan rëndësinë e krijimit të sinergjive ndërmjet institucioneve publike, organizatave të shoqërisë civile dhe profesionistëve të shëndetësisë për të siguruar një qasje më të koordinuar dhe efektive në mbrojtjen e viktimave të dhunës me bazë gjinore.

Projekti AGORA zbatohet nga Qendra “Aleanca Gjinore për Zhvillim” (GADC), në partneritet me Together for Life (TfL) dhe Institutin e Kulturës Rome në Shqipëri (IRCA). Projekti synon të kontribuojë në përmirësimin e cilësisë së shërbimeve sociale dhe shëndetësore për gratë dhe vajzat, veçanërisht për grupet më të margjinalizuara, përmes monitorimit, raportimit, advokimit dhe fuqizimit të kapaciteteve institucionale dhe të shoqërisë civile.

Në përfundim të aktivitetit, pjesëmarrësit riafirmuan rëndësinë e bashkëpunimit të vazhdueshëm ndërmjet institucioneve dhe organizatave për të garantuar zbatimin efektiv të kuadrit ligjor dhe për të siguruar mbrojtje dhe mbështetje më të mirë për gratë dhe vajzat e prekura nga dhuna me bazë gjinore.

Ky publikim është realizuar me mbështetjen financiare të Bashkimit Evropian. Përmbajtja e tij është përgjegjësi e vetme e autorit dhe nuk pasqyron domosdoshmërisht pikëpamjet e Bashkimit Evropian.